اسلام آباد: وفاقی وزیر پٹرولیم علی پرویز ملک سے بین الاقوامی کمپنیوں وی ٹی ٹی آئی اور ہنی ویل یو او پی کے وفود نے الگ الگ ملاقاتیں کیں.
ملاقاتوں میں پاکستان کے توانائی کے شعبے میں سرمایہ کاری اور تعاون کے مختلف امور پر تبادلہ خیال کیا گیا۔
ملاقات کے دوران وی ٹی ٹی آئی نے پاکستان میں انرجی اسٹوریج، بانڈڈ ویئر ہاؤس اور ایل پی جی اسٹوریج ٹرمینل کے منصوبوں میں سرمایہ کاری میں دلچسپی کا اظہار کیا۔
امریکی کمپنی ہنی ویل یو او پی نے پاکستان کی ریفائنری اپ گریڈیشن میں مزید سرمایہ کاری اور جدید ٹیکنالوجی کی فراہمی میں دلچسپی ظاہر کی۔
کمپنی کے نمائندوں نے کہا کہ موجودہ وقت امریکی فنانسنگ سے فائدہ اٹھانے اور ریفائنری اپ گریڈیشن میں سرمایہ کاری کے لیے اہم موقع ہے۔
وفاقی وزیر پٹرولیم علی پرویز ملک نے پاکستان کے توانائی کے شعبے میں بین الاقوامی کمپنیوں کی سرمایہ کاری میں دلچسپی کا خیرمقدم کیا۔
وفاقی وزیر نے کہا کہ حکومت عوام کو صاف، قابل اعتماد اور سستی توانائی کی فراہمی کے لیے اقدامات کر رہی ہے۔
انہوں نے کہا کہ حکومت شفاف اور منصفانہ قیمتوں کے نظام پر یقین رکھتی ہے۔
ریفائنری اپ گریڈیشن کے ذریعے ملکی ریفائننگ صلاحیت اور کارکردگی بہتر بنانے کے لیے پرعزم ہے۔
