اسلام آباد: وفاقی وزیر موسمیاتی تبدیلی اور ماحولیاتی ہم آہنگی ڈاکٹر مصدق مسعود ملک نے اعلان کیا ہے کہ اسلام آباد میں 31 مارچ کے بعد ہفتہ وار شجر کاری مہم شروع کی جائے گی، جس کا مقصد ماحولیاتی تحفظ، شہری معیار زندگی اور موسمیاتی لچک کو مضبوط بنانا ہے۔
شکرپڑیاں میں موسم بہار کے حوالے سے منعقدہ شجر کاری تقریب سے خطاب کرتے ہوئے وفاقی وزیر نے کہا کہ یہ مہم ایک سے دو ماہ تک مختلف مقامات پر جاری رہے گی اور حکومت کی وسیع حکمت عملی کا حصہ ہے جس کے تحت گرین کور بڑھانے اور ماحولیاتی تبدیلی کے اثرات کو کم کرنے پر زور دیا جا رہا ہے۔
وفاقی وزیر نے اسلام آباد میں ہر کٹنے والے درخت کے بدلے دس نئے درخت لگانے کے عزم کو دہراتے ہوئے کہا کہ اس عزم پر عمل در آمد عملی طور پر شروع ہو چکا ہے۔ انہوں نے میڈیا اور عوام کو دعوت دی کہ وہ شجر کاری کے کام کا مشاہدہ کریں اور حکومت کی کارکردگی کا خود جائزہ لیں۔
انہوں نے کہا کہ کمیونٹیز، تعلیمی ادارے، سول سوسائٹی اور کارپوریٹ سیکٹر کی شرکت حکومت کی قومی درخت لگانے کی مہم کی حمایت کے لیے لازمی ہے۔ وزیر نے موجودہ حکومت کے جنگلات کے تحفظ اور ماحولیاتی پائیداری کے عزم کو دہرایا۔
