وفاقی حکومت نے ملک بھر میں کالعدم تنظیموں کے خلاف بڑے پیمانے پر آپریشن کرنے کا فیصلہ کر لیا ہے۔ ذرائع کے مطابق یہ فیصلہ گزشتہ روز اسلام آباد میں ہونے والے ایک اعلیٰ سطحی اجلاس میں کیا گیا جس کی صدارت وفاقی وزیر داخلہ محسن نقوی نے کی۔
اجلاس میں ملکی سلامتی کی مجموعی صورتحال کا تفصیلی جائزہ لیا گیا۔ ذرائع کا کہنا ہے کہ اجلاس کے دوران پاکستان میں داعش کی ممکنہ موجودگی کے خدشات پر بھی غور کیا گیا اور اس حوالے سے سیکیورٹی اداروں کو الرٹ رہنے کی ہدایات جاری کی گئیں۔
مزید بتایا گیا ہے کہ کالعدم تنظیموں کے سلیپر سیلز کے خلاف مؤثر اور مربوط کارروائی کے لیے جامع منصوبہ بندی جاری ہے۔ سیکیورٹی ادارے مختلف پہلوؤں پر مشاورت کر رہے ہیں تاکہ ملک بھر میں کسی بھی ممکنہ خطرے کا بروقت سدباب کیا جا سکے۔
حکومتی ذرائع کے مطابق قومی سلامتی کو یقینی بنانے کے لیے تمام ضروری اقدامات کیے جائیں گے اور دہشت گردی کے خاتمے کے عزم کو ہر صورت برقرار رکھا جائے گا۔
