راولپنڈی شہر میں تعلیمی سرگرمیوں کی بحالی کے ساتھ ہی ٹریفک پولیس نے خصوصی انتظامات مکمل کر لیے، چیف ٹریفک آفیسر (سی ٹی او) فرحان اسلم سمیت تمام افسران خود فیلڈ میں موجود ہیں اور ٹریفک کی روانی کو یقینی بنایا جا رہا ہے ۔
ٹریفک پولیس کے مطابق سکولوں اور کالجوں کے باہر اضافی اہلکار تعینات کر دیے گئے ہیں، جبکہ اہم شاہراہوں پر بھی نفری بڑھا کر پٹرولنگ میں اضافہ کیا گیا ہے تاکہ رش کے اوقات میں ٹریفک کا دباؤ کم رکھا جا سکے ۔
سی ٹی او فرحان اسلم نے کہا کہ رانگ پارکنگ کے خاتمے کے لیے تعلیمی اداروں کے باہر فورک لفٹرز بھی تعینات کیے گئے ہیں، انہوں نے واضح کیا کہ چھٹی کے اوقات میں صرف سنگل لائن پارکنگ کی اجازت ہوگی اور خلاف ورزی پر کارروائی کی جائے گی ۔
انہوں نے تعلیمی اداروں کی انتظامیہ کو ہدایت کی ہے کہ سکول و کالجز کے باہر پک اینڈ ڈراپ لین واضح طور پر مختص کی جائے تاکہ طلبہ اور والدین کو سہولت فراہم ہو سکے ۔
مزید برآں، ایجوکیشن ونگ کو ہدایت جاری کی گئی ہے کہ تعلیمی اداروں میں ٹریفک قوانین اور روڈ سیفٹی سے متعلق آگاہی لیکچرز کا باقاعدہ شیڈول ترتیب دیا جائے، تاکہ طلبہ میں ٹریفک شعور اجاگر کیا جا سکے ۔
