پشاور (شو بز ڈیسک) پشاور اور کوہاٹ کے معروف فنکاروں نعیم کوہاٹی، ندیم ملک، نجیب اللہ، انجم، احمد سجاد، عفت صدیقی، جمیل نوشاہی، اعظم چاچا اور روبینہ قریشی نے مطالبہ کیا ہے کہ کےٹو چینل پر نشر ہونے والا مقبول اور معلوماتی پروگرام ڈھیڈی پشاور اور کوہاٹ میں بھی ریکارڈ کیا جائے۔
فنکاروں کا کہنا تھا کہ کےٹو چینل طویل عرصے سے ڈھیڈی کے ذریعے ہزارہ کی نامور اور باکمال سیاسی، سماجی اور ثقافتی شخصیات کو ناظرین کے سامنے لا رہا ہے۔ یہ پروگرام نہ صرف معروف شخصیات بلکہ لوک فنکاروں، رول ماڈل نوجوان طلبہ و طالبات، سماجی کارکنوں اور شعراء کو بھی متعارف کرا رہا ہے۔
انہوں نے مزید کہا کہ پشاور اور کوہاٹ میں آبادی کی ایک بڑی تعداد کی مادری زبان ہندکو ہے، اس لیے ڈھیڈی کو ان شہروں میں ریکارڈ کرنا ثقافتی نمائندگی اور علاقائی ہم آہنگی کے فروغ کے لیے نہایت اہم ہے۔
