وزیراعلیٰ مریم نوازشریف نے عید کے موقع پر مقررہ کرایوں سے زائد کرایہ وصول کرنے پر سخت قانونی کارروائی کرنے کی ہدایت کر دی ہے۔ اُنہوں نے تمام اضلاع میں مقررہ کرایوں پر عملدرآمد یقینی بنانے کے لیے ضروری اقدامات اٹھانے کا حکم دیا ہے۔
ڈپٹی کمشنرز کو زائد کرایوں کی وصولی اور ٹکٹ بلیک مارکیٹ روکنے کے لیے کڑی مانیٹرنگ کرنے کی ہدایت دی گئی ہے۔ ساتھ ہی تمام بس سٹینڈز پر کرایہ نامے نمایاں آویزاں کرنے کا بھی حکم جاری کیا گیا ہے۔ وزیراعلیٰ مریم نوازشریف نے روزہ دار مسافروں کے افطار کا اہتمام کرنے، بس سٹینڈز کی صفائی ستھرائی کو یقینی بنانے اور انتظار گاہوں پر بیٹھنے کے مناسب انتظامات کے ساتھ پنکھے کی موجودگی یقینی بنانے کی ہدایت بھی دی ہے۔
عوام کو ریلیف دینے کے لیے محکمہ ٹرانسپورٹ اور دیگر متعلقہ حکام کو فیلڈ میں مسلسل چیکنگ ڈیوٹی کرنے کی ہدایت دی گئی ہے۔ مریم نوازشریف نے واضح کیا کہ عید کے موقع پر گھر کو لوٹنے والے غریب مسافروں کے استحصال کی اجازت نہیں دی جائے گی۔ مسافروں سے زائد کرایہ وصول کرنے والوں کے خلاف فوری قانونی کارروائی کی جائے گی اور ہر بس سٹینڈ پر کرایہ نامے نمایاں کر کے عملدرآمد کو یقینی بنایا جائے گا۔
