لاہور: وزیراعلیٰ پنجاب مریم نواز شریف سے لاہور میں نئے تعینات چینی قونصل جنرل سن یان نے ملاقات کی۔ اس موقع پر وزیراعلیٰ مریم نواز شریف نے قونصل جنرل کو تعیناتی پر مبارکباد دی اور دورۂ چین کی دعوت شکریہ کے ساتھ قبول کرلی۔
ملاقات میں دونوں رہنماؤں نے پاک چین دوستی اور سٹریٹجک شراکت داری کو فقیدالمثل قرار دیتے ہوئے، دفاعی تعاون، علاقائی سلامتی اور دیگر ممالک کے ساتھ کشیدگی کم کرنے میں تعاون پر اظہارِ تشکر کیا۔
وزیراعلیٰ مریم نواز شریف نے نئے قونصل جنرل کی سفارتی مہارت کو سراہا اور اقتصادی، ثقافتی، تجارتی، انفراسٹرکچر، توانائی اور آئی ٹی کے شعبوں میں دوطرفہ تعاون کو مزید فروغ دینے پر اتفاق کیا۔
دونوں رہنماؤں نے پاکستان اور چین کی مشترکہ خوشحالی کے لیے کام کرنے کا عزم بھی ظاہر کیا۔
مریم نواز شریف نے کہا کہ پنجاب صنعتی ترقی، تکنیکی تعاون اور شہری انتظام میں چینی شراکت داروں کے ساتھ تعاون کو مضبوط بنانے کا خواہاں ہے اور سی پیک کے تحت صنعتی کاری، لاجسٹک کوریڈورز اور ٹیکنالوجی کی شراکت داری کے ذریعے معاشی ترقی کا ہدف حاصل کیا جائے گا۔
اس ملاقات میں پاک چین اقتصادی راہداری (CPEC) کو علاقائی رابطے اور معاشی ترقی کا انجن قرار دیتے ہوئے، دونوں رہنماؤں نے پنجاب میں چینی سرمایہ کاروں کے لیے محفوظ اور دوستانہ ماحول فراہم کرنے کے عزم کا اعادہ کیا۔
