لیجیئے پاکستان سپر لیگ (پی ایس ایل) کے نویں ایڈیشن کے حوالے سے ایک بری خبر سامنے آئی ہے۔ آج راولپنڈی میں ہونے والے دونوں میچز بارش سے متاثر ہو سکتے ہیں۔
پہلے میچ میں دوپہر دو بجے لاہور قلندرز کا مقابلہ پشاور زلمی سے ہوگا جبکہ دوسرا میچ شام سات بجے اسلام آباد یونائیٹڈ اور کوئٹہ گلیڈی ایٹرز کے درمیان کھیلا جائے گا۔
ان میچوں سے قبل شائقین کے لیے بری خبر یہ سامنے آرہی ہے کہ آج راولپنڈی میں بارش کا امکان ہے۔ یاد رہے کہ کل دارالحکومت اسلام آباد سمیت راولپنڈی میں بھی گرج چمک کے ساتھ بارش ہوئی جس کے بعد آج بھی بارش کی پیش گوئی کی گئی ہے۔ گوگل بھی یہی بتا رہا ہے کہ راولپنڈی میں بارش کا قوی امکان ہے۔
واضح رہے کہ آج ہونے والے دونوں میچوں کے لیے شائقین کو ایک ہی ٹکٹ جاری کیا گیا ہے، اگر میچ بارش کے باعث منسوخ ہو جاتے ہیں تو پاکستان کرکٹ بورڈ جانب سے مکمل ریفنڈ دیا جائے گا اور اگر ایک میچ بھی ممکن ہوگیا تو ٹکٹوں کا ریفنڈ نہیں دیا جائے گا۔
