آزادکشمیر کے وزیراعظم فیصل ممتاز راٹھور نے کہا ہے کہ مہاجرین کی نشستوں کا معاملہ ایک بامعنی بحث کا متقاضی ہے، مہاجرین کی نشستوں کے خاتمے پر بحث کے لیے موزوں ترین جگہ قانون ساز اسمبلی ہے اور یہ کہ ان نشستوں کا خاتمہ ایک جائز مطالبہ ہے ۔
مظفرآباد: ایک بیان میں وزیراعظم آزادکشمیر فیصل ممتاز راٹھور کا کہنا تھا کہ سیاسی حقوق حاصل کرنےکا بہترین طریقہ سیاسی جدوجہد ہے، احتجاج یا ہنگامہ آرائی نہیں، جہاں تک مہاجرین کی نشستوں کا تعلق ہے، تو ان کی موجودہ حیثیت ناقابل قبول ہے ۔
فیصل ممتاز راٹھور کا مزید کہنا تھا کہ مہاجرین نشستوں کا خاتمہ کوئی شکوہ یا گلہ نہیں، بلکہ ایک جائز مطالبہ ہے، مہاجرین کی نشستوں کے خاتمے پر بحث کے لیے موزوں ترین جگہ قانون ساز اسمبلی ہے ۔
دوسری جانب وزیراعظم آزادکشمیر کے بیان پر ردعمل دیتے ہوئے وفاقی وزیر برائے پارلیمانی امور طارق فضل چودھری نے کہا ہے کہ فیصل ممتاز راٹھور نے اگر کوئی رائے دی یا فارمولا ہے تو شیئر نہیں کیا گیا، سوشل میڈیا رپورٹس پر ہم اپنی رائے نہیں دے سکتے ۔
طارق فضل چودھری کا کہنا تھا کہ وزیراعظم آزادکشمیر مسلم لیگ ن سے کوئی بات کریں گے تو اپنا رد عمل دیں گے، ہمارا مؤقف ہےکہ 12 نشستیں فی الفور ختم نہیں ہوسکتیں، اس کے خاتمےکے لیے آئینی ترمیم درکار ہے ۔
