افغانستان یونائیٹڈ فرنٹ کے سربراہ جنرل سمیع سادات نے طالبان حکومت کے خلاف بڑے پیمانے پر کارروائیاں شروع کرنے کا اعلان کرتے ہوئے دعویٰ کیا ہے کہ قندھار میں بھی طالبان کے ٹھکانوں کو نشانہ بنایا گیا ہے ۔
افغان یونائیٹڈ فرنٹ کے مطابق، بدخشان اور دیگر شمالی صوبوں کے بعد اب طالبان کے مضبوط گڑھ قندھار میں بھی کارروائیاں کی جا رہی ہیں ۔ تنظیم کا دعویٰ ہے کہ اسپین بولدک شاہراہ پر طالبان کی فوجی تنصیبات اور ایک قافلے کو نشانہ بنایا گیا ۔
جنرل سمیع سادات نے ایک ویڈیو بیان میں کہا کہ افغانستان کے مختلف علاقوں اور صوبوں میں طالبان حکومت کے خلاف بڑے آپریشنز کا آغاز ہو چکا ہے ۔ ان کے مطابق ان کارروائیوں کا مقصد طالبان کی حکمرانی کو چیلنج کرنا ہے ۔
جنرل سمیع سادات افغانستان کی سابق حکومت میں ایک سینئر فوجی افسر رہ چکے ہیں۔ انہوں نے 2023 میں امریکا میں افغانستان یونائیٹڈ فرنٹ کی بنیاد رکھی تھی ۔
طالبان حکومت کی جانب سے ان دعوؤں پر تاحال کوئی باضابطہ ردعمل سامنے نہیں آیا، جبکہ ان کارروائیوں کی آزاد ذرائع سے بھی تصدیق نہیں ہو سکی ۔
