نائب وزیر اعظم و وزیر خارجہ سینیٹر محمد اسحاق ڈار نے جمعرات کو ایک اہم اجلاس کی صدارت کی جس میں ملک میں پیٹرولیم مصنوعات کے ذخائر اور مشرق وسطیٰ کی موجودہ صورتحال کے تناظر میں تیاریوں کا تفصیلی جائزہ لیا گیا۔
اجلاس کے دوران بریفنگ میں بتایا گیا کہ ملک میں اس وقت پیٹرولیم مصنوعات کے وافر ذخائر موجود ہیں جو اپریل کے مہینے اور اس کے بعد کی ضروریات کو پورا کرنے کے لیے کافی ہیں۔ نائب وزیر اعظم نے موجودہ سپلائی صورتحال پر اطمینان کا اظہار کرتے ہوئے متعلقہ وزارتوں اور اداروں کو ہدایت کی کہ وہ باہمی رابطہ مزید مضبوط بنائیں، پیٹرولیم مصنوعات کی بلا تعطل فراہمی کو یقینی بنائیں اور آئندہ ہفتوں میں ذخائر کو محفوظ رکھنے کے لیے تمام ضروری اقدامات کریں۔
اجلاس میں وفاقی وزیر پیٹرولیم، معاون خصوصی طارق باجوہ، وفاقی وزیر برائے اقتصادی امور، متعلقہ وفاقی سیکرٹریز، صوبوں کے چیف سیکرٹریز اور اعلیٰ حکام نے شرکت کی۔
