ایبٹ آباد میں اغوا کے بعد قتل کی گئی ڈاکٹر وردہ کی پوسٹ مارٹم کے بعد تدفین کر دی گئی، علاقہ بھر کی فضا دوسرے روز بھی سوگوار رہی ۔
ایبٹ آباد: ڈاکٹر وردہ کی نماز جنازہ میں اہلخانہ، رشتہ داروں اور شہریوں کی بڑی تعداد میں شرکت کی، لاش گزشتہ روز 4 دن بعد مقتولہ کی دوست اور کرائے کے قاتل کی نشاندہی پر ٹھنڈیانی کے جنگل سے ملی تھی ۔
پولیس کی تحقیقات کے مطابق ڈاکٹر وردہ نے 67 تولے سونا اپنی دوست کے پاس بطور امانت رکھا ہوا تھا، امانت کی واپسی پر دونوں میں معاملہ بگڑا تھا ۔
ملزمہ نے 67 تولے سونا ہتھیانے کیلئے دوست ڈاکٹر کو کرائے کے قاتلوں کے حوالے کیا، ملزمہ کی نشاندہی پر اجرتی قاتل سمیت 3 ملزم گرفتار کر لئے گئے ہیں جبکہ مرکزی ملزم فرار ہو گیا ۔
ڈاکٹرز ایسوسی ایشن نے احتجاج کرتے ہوئے کہا ہے کہ پولیس بروقت کارروائی کرتی تو لیڈی ڈاکٹر کی زندگی بچ سکتی تھی ۔
