ایبٹ آباد میں طوفانی بارشوں نے تباہی مچا دی ہے۔ تحصیل لورہ میں نگری پل کو شدید نقصان پہنچا ہے جس کے باعث علاقہ مکین سخت مشکلات کا شکار ہیں۔
پل کے بہہ جانے سے سینکڑوں دیہاتوں کا ایبٹ آباد اور راولپنڈی سے رابطہ مکمل طور پر منقطع ہوگیا ہے۔ یہ پل تحصیل لورہ کے بیشتر علاقوں کو مرکزی شہروں سے جوڑتا تھا اور اس کی اہمیت نہایت زیادہ ہے۔ خاص طور پر یہ پل صوبائی اسمبلی کے رکن رجب علی عباسی کے آبائی گاؤں کو بھی جوڑتا ہے، اس لیے اس کی تباہی نے علاقے میں زندگی کو مزید متاثر کیا ہے۔
پل تباہ ہونے کے بعد درجنوں دیہاتوں کے رہائشی محصور ہوکر رہ گئے ہیں۔ ندی ہرو میں طغیانی آنے کی وجہ سے لوگ ندی کو بھی کراس نہیں کرسکتے، جس کے باعث نقل و حرکت تقریباً ناممکن ہوگئی ہے۔
علاقہ مکینوں نے حکومت سے مطالبہ کیا ہے کہ نگری پل کی فوری بحالی کے لیے اقدامات کیے جائیں تاکہ رابطہ بحال ہوسکے اور لوگ معمولات زندگی دوبارہ شروع کرسکیں۔
