مانسہرہ میں ہزارہ ایکسپریس وے کے قریب حادثے کے نتیجے میں ایک پولیس اہلکار جاں بحق جبکہ دوسرا زخمی ہو گیا ہے۔
جاں بحق اہلکار کی شناخت موٹروے پولیس سب انسپیکٹر شبیر احمد کے نام سے ہوئی۔ ہیڈ کانسٹیبل سہیل ملک زخمی ہو گئے ہیں۔ حادثے کے وقت دونوں سڑک پہ خراب ہونے والی گاڑی کو مدد فراہم کر رہے تھے۔
حادثہ پک اپ ڈرائیور کی غفلت و لاپرواہی کی وجہ سے پیش آیا۔ حادثے کی اطلاع ملتے ہی دونوں کو زخمی حالت میں ڈی ایچ کیو بٹگرام منتقل کیا گیا، سب انسپیکٹر شبیر احمد کو اے ایم سی ایبٹ اباد منتقل کر دیا گیا، جہاں وہ زخموں کی تاب نہ لاتے ہوئے انتقال کر گئے۔ غفلت و لاپرواہی کا مظاہرہ کرنے والے ڈرائیور کو حراست میں لے لیا گیا ہے۔
