یومِ دفاعِ پاکستان کے موقع پر سکردو میں ایک پروقار تقریب کا انعقاد کیا گیا، جس میں سرکاری افسران، پولیس اہلکاروں اور شہریوں کی بڑی تعداد نے شرکت کی ۔
سکردو: ایڈمنسٹریشن کمپلیکس میں منعقدہ تقریب کے دوران پرچم کشائی کی گئی، جبکہ پولیس کے چاق و چوبند دستے نے قومی پرچم کو سلامی پیش کی، تقریب میں وطنِ عزیز کے دفاع کے لیے جانوں کا نذرانہ پیش کرنے والے شہداء اور غازیوں کو خراجِ عقیدت پیش کیا گیا ۔
تقریب کے اختتام پر ایڈمنسٹریشن کمپلیکس سے ایک بڑی ریلی نکالی گئی، جس میں شہریوں کی بڑی تعداد نے شرکت کی، شرکاء نے پاکستان اور پاک فوج کے حق میں نعرے بلند کرتے ہوئے وطن سے محبت، قومی یکجہتی اور ملکی دفاع کے عزم کا اظہار کیا ۔
ریلی ہائی اسکول سکردو پہنچ کر ایک باقاعدہ تقریب میں تبدیل ہوگئی، جہاں مقررین نے خطاب کرتے ہوئے کہا کہ 6 ستمبر پاکستان کی تاریخ کا ایک ناقابلِ فراموش دن ہے، 1965ء کی جنگ میں پاک فوج اور پاکستانی قوم نے دشمن کے عزائم کو ناکام بنا کر بہادری، اتحاد اور جذبۂ حب الوطنی کی شاندار مثال قائم کی ۔
مقررین کا کہنا تھا کہ یومِ دفاع ہمیں اپنے شہداء اور غازیوں کی لازوال قربانیوں کو یاد کرنے کے ساتھ ساتھ ملک کے دفاع، سلامتی اور خودمختاری کے تحفظ کے لیے متحد رہنے کا پیغام دیتا ہے ۔
انہوں نے کہا کہ پاکستان کی حفاظت، استحکام اور ترقی کے لیے پوری قوم کو قومی اتحاد، یکجہتی اور باہمی ہم آہنگی کا مظاہرہ کرنا ہوگا،تقریب کے اختتام پر ملکی سلامتی، استحکام اور ترقی کے لیے خصوصی دعائیں بھی کی گئیں ۔
