اسلام آباد: کنٹرول لائن کے دونوں جانب اور دنیا بھر میں مقیم کشمیری آج 27 اکتوبر کو یومِ سیاہ منا رہے ہیں.
یومِ سیاہ کا مقصد عالمی برادری کی توجہ مسئلہ کشمیر کی جانب مبذول کروانا ہے۔
یومِ سیاہ منانے کی اپیل کل جماعتی حریت کانفرنس نے کی ہے۔
مقبوضہ جموں و کشمیر میں آج مکمل ہڑتال ہے اور احتجاجی مظاہرے کیے جا رہے ہیں۔
کشمیریوں کا مؤقف ہے کہ بھارت نے 27 اکتوبر 1947 کو تقسیمِ برصغیر کے منصوبے کی خلاف ورزی کرتے ہوئے جموں و کشمیر پر فوجی کارروائی کے ذریعے قبضہ کیا۔
آزاد کشمیر، پاکستان اور دنیا کے مختلف ممالک میں احتجاجی مارچ، ریلیاں اور سیمینار منعقد کیے جارہے ہیں۔
ان اقدامات کا مقصد عالمی برادری کو مسئلہ کشمیر کے حوالے سے اس کی ذمہ داریاں یاد دلانا ہے۔
دوسری جانب مقبوضہ جموں و کشمیر میں 2019 سے جون 2026 تک 16 ہزار 397 خواتین اور کم عمر لڑکیوں کے لاپتہ ہونے کا انکشاف ہوا ہے، جن میں سے 4 ہزار 271 تاحال لاپتہ ہیں۔
مقبوضہ جموں و کشمیر کے محکمہ داخلہ سے حقِ معلومات قانون کے تحت حاصل کردہ اعداد و شمار کے مطابق اس عرصے میں 14 ہزار 593 خواتین اور 804 بچیاں لاپتہ ہوئیں۔
