مانسہرہ: تحصیل بالاکوٹ کے تھانہ ناران کی حدود میں مبینہ طور پر معمولی تنازع پر دو بچوں کو پتھروں کے وار کرکے قتل کردیا گیا۔
پولیس ذرائع کے مطابق واقعہ کچ ماہلی ڈنہ کے علاقے میں پیش آیا، جہاں دو گروپوں کے بڑوں کے درمیان پہلے تلخ کلامی ہوئی تھی۔ اگلے روز مبینہ طور پر مخالف فریق کے افراد نے وہاں موجود بچوں پر پتھروں سے حملہ کردیا، جس کے نتیجے میں رشید ولد حیدر اور عبدالرحمان ولد جمال جاں بحق ہوگئے۔
تھانہ ناران میں درج ایف آئی آر کے مطابق مقتول عبدالرحمان کی والدہ مہناز زوجہ جمال نے پولیس کو بتایا کہ 10 ستمبر کو تقریباً ڈھائی بجے رشید اور عبدالرحمان اپنے مویشیوں کے ہمراہ ڈنہ میں موجود تھے کہ مخالف فریق کے چھ افراد وہاں پہنچے اور گالم گلوچ شروع کردی۔ ایف آئی آر کے مطابق اسی دوران دونوں بچوں پر پتھروں سے حملہ کیا گیا، جس سے وہ جاں بحق ہوگئے۔
ناران پولیس نے واقعے کا مقدمہ درج کرتے ہوئے عالم زیب، مسکین، رنگین اور بھٹو سمیت ہری پور سے تعلق رکھنے والے چھ افراد کو نامزد کیا ہے۔ پولیس کے مطابق واقعے کی مزید تحقیقات جاری ہیں۔
مقامی ذرائع کے مطابق دونوں گروپوں کا تعلق ہری پور کے علاقے گلو دی بانڈی سے ہے اور وہ خانہ بدوش خاندانوں سے تعلق رکھتے ہیں۔ ذرائع کا کہنا ہے کہ واقعے سے ایک روز قبل بھی دونوں گروپوں کے درمیان تلخ کلامی ہوئی تھی، تاہم اس وقت تھانہ ناران میں قانونی کارروائی کے بغیر معاملہ ختم ہوگیا تھا۔ اگلے روز مبینہ طور پر دوبارہ تنازع ہوا، جس کے دوران دونوں بچوں کے قتل کا افسوسناک واقعہ پیش آیا۔
