پاکستان پیپلزپارٹی اور جمعیت علمائے اسلام نے آزاد کشمیر میں قانون ساز اسمبلی کے انتخابات کیلئے سیاسی اتحاد کا اعلان کردیا، آزاد کشمیر قانون ساز اسمبلی کے انتخابات 27 جولائی کو ہوں گے ۔
اسلام آباد میں پیپلزپارٹی اور جے یو آئی آزادکشمیر کے رہنماؤں نے اہم ملاقات کے بعد مشترکہ پریس کانفرنس کی، اس موقع پر پی پی رہنما چودھری یاسین نے کہا کہ آزاد کشمیرمیں جے یوآئی کے ساتھ باضابطہ سیاسی اتحاد کا اعلان کرنے جارہے ہیں، اس اتحاد سے ریاست میں دونوں جماعتوں کو فائدہ ہوگا ۔
ان کا کہنا تھا کہ پیپلزپارٹی کی قیادت نے ہمیشہ مسئلہ کشمیر کو ہر فورم پر اجاگر کیا،انہوں نے اعلان کیا کہ ایل 14 اورایل 23 پر جے یوآئی امیدوار دونوں پارٹیوں کے مشترکہ امیدوار ہوں گے ۔
اس موقع پر جے یو آئی آزاد کشمیر کے امیر مولانا سعید یوسف کا کہنا تھاکہ آج آزاد جموں و کشمیر کی تاریخ میں پہلی بار ہمارا پیپلز پارٹی کے ساتھ اتحاد ہوگیا ہے، پیپلزپارٹی ہمیں دو حلقوں میں سپورٹ کرے گی اوردیگر تمام حلقوں میں جے یوآئی پیپلزپارٹی کے امیدواروں کو سپورٹ کرے گی ۔
