لاہور: سابق وزیراعظم اور صدر مسلم لیگ ن نواز شریف نے آزاد جموں و کشمیر کے عوام سے اپیل کی ہے کہ وہ پاکستان کے ساتھ اپنا نظریاتی رشتہ برقرار رکھتے ہوئے پُرامن رہیں اور دھرنوں کو ختم کر کے بامقصد مذاکرات کا راستہ اختیار کریں۔
نواز شریف کی زیر صدارت ایک اعلیٰ سطح کا اجلاس ہوا، جس میں آزاد جموں و کشمیر کی موجودہ سیاسی اور انتظامی صورتحال پر تفصیلی غور کیا گیا۔
اجلاس سے خطاب کرتے ہوئے نواز شریف نے کہا کہ مسلم لیگ ن مسئلہ کشمیر پر واضح مؤقف رکھتی ہے۔ ان کا کہنا تھا کہ جموں و کشمیر کے عوام کو اقوام متحدہ کی قراردادوں کے مطابق حقِ خودارادیت ملنا چاہیے۔
نواز شریف نے کہا کہ مسلم لیگ ن نے ہمیشہ آزاد جموں و کشمیر کے عوام کی تعمیر و ترقی کو ترجیح دی ہے۔ انہوں نے ہدایت کی کہ عوام کی فلاح و بہبود کے لیے تمام وسائل اور صلاحیتیں بروئے کار لائی جائیں۔
سابق وزیراعظم نے کہا کہ عوامی حقوق کے لیے آئین کے اندر رہتے ہوئے جدوجہد کرنی چاہیے۔ انہوں نے کہا کہ مسلم لیگ ن تمام جمہوری قوتوں کے ساتھ مل کر اپنا بھرپور کردار ادا کرے گی۔
نواز شریف کا کہنا تھا کہ کشمیری عوام نے پاکستان کے لیے لازوال قربانیاں دی ہیں۔ انہوں نے آزاد کشمیر کے عوام سے اپیل کی کہ وہ پُرامن رہیں، دھرنوں کو ختم کریں اور مسائل کے حل کے لیے بامقصد مذاکرات کریں۔
انہوں نے امید ظاہر کی کہ تمام سیاسی جماعتیں آزاد کشمیر میں امن کی بحالی کے لیے اپنا کردار ادا کریں گی۔ نواز شریف نے کہا کہ موجودہ حالات میں حکومت پاکستان اور دفاعی اداروں نے اہم کامیابیاں حاصل کی ہیں، اس لیے پاکستان اور آزاد کشمیر میں بھائی چارے اور رواداری کی سیاست کو فروغ دینا چاہیے۔
