پشاور زلمی نے پاکستان سپر لیگ میں تاریخ رقم کرلی، کراچی کنگز کو 159 رنز کے بڑے مارجن سے ہراکر ایونٹ کی سب سے بڑی فتح حاصل کرلی، پشاور کے 247 رنز ہدف کے تعاقب میں کراچی کی پوری ٹیم 87 رنز پر ڈھیر ہو گئی ۔
کراچی میں کھیلے گئے پی ایس ایل الیون کے اہم میچ میں کراچی کنگز نے ٹاس جیت کر پشاور زلمی کو پہلے بیٹنگ کی دعوت دی ۔
پشاور زلمی نے کوسال مینڈس اور کپتان بابراعظم کی شاندار اننگز کی بدولت کراچی کنگز کو جیت کیلئے 247 رنز کا ہدف دیا،کوسال مینڈس نے 109 رنز کی شاندار اننگز کھیلی جبکہ بابر اعظم 87 رنز بناکر ناقابل شکست رہے ۔
بابر اعظم اور کوسال مینڈس کے درمیان پی ایس ایل کی تاریخ کی سب سے بڑی شراکت داری قائم ہوئی، اس جوڑی نے دوسری وکٹ پر 191 رنز کی پارٹنرشپ قائم کی ۔
اس کے علاوہ عبدالصمد نے جارحانہ اننگز کھیل کر 12 گیندوں پر 40 رنز بنائے جس میں 4 چھکے اور 3 چوکے شامل تھے، کراچی کنگز کی جانب سے عباس آفریدی نے 2 کھلاڑیوں کو آؤٹ کیا ۔
کراچی کنگز کی ٹیم 247 رنز کے ہدف کے تعاقب میں 87 رنز پر آؤٹ ہوگئی،کراچی کنگز کے اعظم خان 25 رنز بناکر ٹاپ سکورر رہے ۔
پشاور زلمی کی جانب سے ناہید رانا، افتخار احمد اور سفیان مقیم نے3،3 کھلاڑی آؤٹ کیے، شاندار سنچری سکور کرنے پر کوسال مینڈس میچ کے بہترین کھلاڑی قرار پائے ۔
