وزیراعلیٰ پنجاب مریم نواز شریف نے چاند رات اور عیدالفطر کے موقع پر بس سٹینڈز، تجارتی مراکز اور مارکیٹوں کی فول پروف سکیورٹی یقینی بنانے کی ہدایت کی ہے۔
وزیراعلیٰ نے چاند رات پر بازاروں میں اضافی نفری تعینات کرنے کا حکم دیتے ہوئے خواتین اور بچوں کے تحفظ کے لیے ویمن پولیس سکواڈ کے باقاعدہ گشت کی ہدایت کی ہے۔ انہوں نے کہا کہ بازاروں میں ہراسانی کے واقعات کی روک تھام ہر صورت یقینی بنائی جائے۔ بازاروں اور مارکیٹوں کی نگرانی کیلئے ڈرون کیمروں اور رات کے اوقات میں نائٹ ویژن دوربین کے استعمال کی ہدایت بھی جاری کی گئی ہے۔
مریم نواز شریف نے چاند رات پر سڑکوں پر ون ویلنگ کی روک تھام کیلئے سخت نگرانی کا حکم دیا ہے جب کہ اے ٹی ایمز اور بینکوں کے اطراف سکیورٹی اور گشت بڑھانے کی بھی ہدایت کی ہے۔ انہوں نے پولیس اور ٹرانسپورٹ حکام کو وین اڈوں اور بس سٹینڈز پر مسلسل مانیٹرنگ یقینی بنانے اور بسوں و وینز کی ونڈ سکرین پر مقررہ کرایہ نامہ آویزاں کرنے کی بھی ہدایت جاری کی ہے۔
