دیر لوئر میں خیبر نیوز کے نمائندے محمد اسرار پر نامعلوم افراد کا حملہ اور تشدد، زخمی حالت میں ہسپتال منتقل، محمد اسرار کو سر، پیر او ہاتھوں میں شدید چوٹیں آئیں ۔
لوئر دیر: خیبر نیوز کے نمائندے محمد اسرار پر نامعلوم افراد نے گھر کے سامنے تشدد کیا،حملہ آوروں نے باقاعدہ نام لے کر محمد اسرار کو گھر سے باہر بلایا اور پھر ان پر لاٹھیوں اور مکھوں سے حملہ کر دیا ۔
عینی شاہدین کے مطابق چند مسلح افراد نے گھر کے باہر کھڑے ہو کر پکارا اور جیسے ہی محمد اسرار باہر نکلے، ان پر تشدد کیا گیا ۔
شدید زخموں کے باعث انہیں فوری طور پر قریبی ہسپتال منتقل کر دیا گیا جہاں ڈاکٹروں نے اُنہیں طبی امداد دی،محمد اسرار کے اہل خانہ نے بتایا کہ حملہ آوروں نے کوئی بات نہیں کی، صرف تشدد کیا اور فرار ہو گئے ۔
پولیس نے موقع پر پہنچ کر مقدمہ درج کر لیا اور ملزمان کی گرفتاری کے لیے تفتیشی ٹیم تشکیل دے دی گئی ہے،تاہم ابھی تک کوئی گرفتاری عمل میں نہیں آئی، صحافیوں کی تنظیموں نے اس واقعے کی شدید مذمت کرتے ہوئے حکومت سے فوری نوٹس لینے اور صحافیوں کی سیکیورٹی بڑھانے کا مطالبہ کیا ہے ۔
یہ واقعہ دیر لوئیر میں صحافیوں پر بڑھتے حملوں کی تازہ ترین مثال ہے، محمد اسرار گزشتہ کئی برسوں سے علاقائی مسائل، کرپشن اور انسانی حقوق پر بے باک رپورٹنگ کرتے رہے ہیں، ان کے زخمی ہونے سے صحافی برادری میں شدید غم و غصہ پایا جا رہا ہے ۔
محمد اسرار کی جلد صحت یابی کی دعا کی جا رہی ہے، انتظامیہ سے اپیل کی گئی ہے کہ اس واقعے کی شفاف اور تیز تحقیقات کی جائیں تاکہ صحافیوں پر ایسے حملوں کا سلسلہ روکا جا سکے ۔
