پشاور میں منعقدہ خیبر پولو فیسٹیول 2026 کا پہلا ایڈیشن شاندار انداز میں اختتام پذیر ہوا۔ فائنل میچ میں پولو کے روایتی حریف، چترال اور گلگت بلتستان کی ٹیموں نے ایک دوسرے کے خلاف زبردست مقابلہ کیا۔
سنسنی خیز کھیل کے دوران گلگت بلتستان کی ٹیم نے عمدہ کارکردگی کا مظاہرہ کرتے ہوئے چترال کو شکست دے کر فائنل اپنے نام کیا۔
اس شاندار موقع پر مہمانِ خصوصی کور کمانڈر پشاور موجود تھے۔ تقریب میں خیبر پختونخوا اور گلگت بلتستان کے مختلف علاقوں سے ہزاروں شائقین نے شرکت کی، جنہوں نے پولو کے ہر لمحے کا بھرپور لطف اٹھایا۔
پولو فیسٹیول کے دوران ثقافتی رنگ بھی نمایاں رہے۔ چترالی ڈانس، روایتی لوک رقص اور میوزیکل پرفارمنس نے حاضرین کو محظوظ کیا جبکہ نیزہ بازی کے روایتی کھیل کا شاندار مظاہرہ بھی پیش کیا گیا۔
فیسٹیول میں مزید جوش و خروش پیدا کرنے کے لیے پاک آرمی کے ایس ایس جی جوانوں نے فری فال جمپس کا مظاہرہ بھی کیا، جس نے تقریب کو یادگار بنا دیا۔
کور کمانڈر پشاور نے فیسٹیول کے کامیاب انعقاد کو سراہتے ہوئے کہا کہ ایسی سرگرمیاں نوجوانوں کی مثبت مصروفیات، قومی ثقافت کے فروغ اور علاقائی ہم آہنگی کو مضبوط بنانے میں اہم کردار ادا کرتی ہیں۔
