فیلڈ مارشل سید عاصم منیر، NI (M)، HJ، چیف آف آرمی اسٹاف نے پنجاب کے سیلاب سے متاثرہ علاقوں کا تفصیلی دورہ کیا۔ اس موقع پر انہوں نے سیالکوٹ سیکٹر، شکر گڑھ، نارووال اور کرتار پور کا معائنہ کیا اور جاری ریسکیو و ریلیف آپریشنز کا جائزہ لیا۔ دورے کے دوران آرمی چیف کو موجودہ صورتحال کے ساتھ ساتھ آئندہ بارشوں کے ممکنہ اسپیل سے نمٹنے کی تیاریوں پر بھی جامع بریفنگ دی گئی۔
سی او اے ایس نے فوجی جوانوں اور سول انتظامیہ کی مربوط اور انتھک کوششوں کو سراہا جنہوں نے متاثرہ لوگوں کو بچانے اور انہیں بروقت امداد فراہم کرنے میں نمایاں کردار ادا کیا۔ انہوں نے کہا کہ فوج اور سول اداروں کی یہ مشترکہ کاوشیں متاثرین کے لیے امید کی کرن ہیں۔
اپنے دورے کے دوران چیف آف آرمی اسٹاف نے متاثرہ سکھ برادری سے بھی ملاقات کی اور انہیں یقین دلایا کہ سیلاب کے باعث متاثر ہونے والے تمام مذہبی مقامات، بالخصوص دربار صاحب کرتار پور، کو اصل حالت میں بحال کرنے کے لیے ترجیحی اقدامات کیے جائیں گے۔ ان کا کہنا تھا کہ اقلیتوں کے حقوق اور ان کے مذہبی مقامات کا تحفظ ریاست اور اس کے اداروں کی بنیادی ذمہ داری ہے اور پاکستان اس ذمہ داری کو ہر صورت پورا کرے گا۔ سکھ برادری نے آرمی چیف کا پُرتپاک استقبال کیا اور مشکل گھڑی میں فوج اور سول انتظامیہ کی خدمات پر ان کا شکریہ ادا کیا۔
آرمی چیف نے اپنے دورے کے دوران دربار صاحب کرتار پور کا فضائی جائزہ بھی لیا۔ اس موقع پر انہوں نے سول انتظامیہ کے نمائندوں سے ملاقات کی اور ان کے بروقت اور فعال ردعمل کو سراہا جس کے نتیجے میں قیمتی جانوں اور املاک کے بڑے نقصان کو روکنے میں مدد ملی۔
فوجی جوانوں کے ساتھ ملاقات میں فیلڈ مارشل عاصم منیر نے ان کے بلند حوصلے، آپریشنل تیاری اور عوام کی خدمت کے جذبے کی تعریف کی۔ انہوں نے کہا کہ مشکل حالات میں قوم کے لیے ان کی خدمات لائق تحسین ہیں۔
فیلڈ مارشل سید عاصم منیر کی آمد پر کور کمانڈر گوجرانوالہ نے ان کا استقبال کیا۔
