مانسہرہ کے علاقے ریڑھ بیلہ میں پولیس اہلکار کی شادی کی تقریب میں نوجوانوں میں معمولی تکرار کے بعد فائرنگ سے نوجوان جاں بحق جبکہ ایک شخص زخمی ہو گیا ، پولیس نے فائرنگ میں ملوث ملزم کو گرفتار کرکے مقدمہ درج کرلیا ۔
مانسہرہ: تفصیلات کے مطابق منگل اور بدھ کی درمیانی شب بارہ بجے کے قریب تھانہ صدر کی حدود ریڑھ بیلہ
میں پولیس کے اہلکار سرمد شکیل ولد محمد شکیل کی شادی کی تقریب میں فائرنگ کے نتیجے میں احسن ولد غلام مرتضی جاں بحق جبکہ سفیر احمد ولد تاج محمد گولی لگنے سے شدید زخمی ہو گیا ہے ۔
اس سلسلے میں مقتول کے بھائی محسن ولد غلام مرتضی نے تھانہ صدر پولیس کو تفصیلات بتاتے ہوئے موقف اختیار کیا کہ اس کا بھائی پولیس اہلکار احسن سرمد شکیل کی شادی میں شریک تھا اس دوران ملزم قاسم ہوائی فائرنگ کر رہا تھا جس کو مقتول احسن نے منع کیا تو اس نے طیش میں آکر احسن اور سفیر پر فائرنگ کر دی ۔
ایف آئی آر کے مطابق فائرنگ کے نتیجے میں احس موقع پر جاں بحق ہو گیا اور سفیر کو زخمی حالت میں کنگ عبداللہ ہسپتال منتقل کر دیا گیا ۔
تھانہ صدرپولیس نے مقدمہ درج کرکے ملزم قاسم ولد غالب کو گرفتار کرکے آلہ قتل برآمد کر لیا ہے ۔
