پولیس کے مطابق لکی مروت کے علاقہ خیروخیل پکہ کے قریب دہشت گردوں نے فائرنگ کی جس سے دو پولیس اہلکار شہید ہو گئے، دونوں اہلکار ڈاک ڈیوٹی پر تعینات تھے اور موٹرسائیکل پر ڈاک لینے تھانے جا رہے تھے کہ دہشت گردوں نے نشانہ بنایا ۔
پولیس اہلکار شہید حکمت اللہ تھانہ پیزو اور شہید خان بہادر تھانہ شہباز خیل میں تعینات تھے ، فائرنگ کے بعد دہشت گرد موقع سے فرار ہونے میں کامیاب ہوگئے، پولیس نے مزید کارروائی شروع کردی ۔
وزیرداخلہ محسن نقوی نے لکی مروت پولیس اہلکاروں پر دہشت گردوں کی فائرنگ کے واقعہ کی مذمت کرتے ہوئے فائرنگ سے جام شہادت نوش کرنے والے 2 پولیس اہلکاروں کو خراج عقیدت پیش کی ہے ۔
وزیر داخلہ محسن نقوی نے شہید پولیس اہلکاروں کے لواحقین سے دلی ہمدردی و اظہار تعزیت کرتے ہوئے کہا ہے کہ شہید پولیس اہلکاروں کی قربانی کو سلام پیش کرتے ہیں ۔
انہوں نے کہا کہ دکھ کی گھڑی میں شہداء کے خاندانوں کے ساتھ کھڑے ہیں،دہشت گردی کے خلاف جنگ میں خیبرپختونخوا پولیس نے جانوں کی قربانی دے کر تاریخ رقم کی ہے،پولیس کی قربانیوں کو قدر کی نگاہ سے دیکھتے ہیں ۔
