پاکستانی سکیورٹی فورسز نے دہشت گردوں کی جانب سے افغان طالبان کی چیک پوسٹوں کا استعمال کر کے پاکستان میں دراندازی کی کوشش ناکام بناتے ہوئے دشمن کو بھاری جانی و مالی نقصان پہنچایا ہے ۔
سکیورٹی ذرائع نے تصدیق کی ہے کہ 20 سے 25 دہشت گردوں نے کرم، شمالی وزیرستان سے افغان طالبان کی چیک پوسٹوں کا استعمال کر کے دراندازی کی کوشش کی تاہم سکیورٹی فورسز نے بروقت کارروائی کرتے ہوئے دراندازی کی کوشش ناکام بنادی ۔
ذرائع کا بتانا ہے کہ آج صبح دہشت گردوں نے افغان طالبان سے مل کر پاکستانی چوکیوں پر بھاری ہتھیاروں سے بِلااشتعال فائرنگ کی، سکیورٹی فورسز نے اس بلااشتعال فائرنگ کا منہ توڑ جواب دیا، افغانستان سائیڈ پر بھاری نقصانات کی مصدقہ ابتدائی اطلاعات ہیں ۔
سکیورٹی ذرائع کے مطابق مؤثرجوابی کارروائی اورگولہ باری سے افغان طالبان 6 چوکیاں چھوڑکربھاگ گئے، افغان سائیڈ پر نقصانات مزید بڑھنے کی بھی اطلاعات ہیں، پاکستان سکیورٹی فورسزکاکوئی جانی نقصان نہیں ہوا، صرف 3 افراد کے زخمی ہونےکی اطلاع ہے ۔
ذرائع کا کہنا ہے کہ پاکستان نے افغان عبوری حکومت سے دہشت گردوں کو اپنی سرزمین نہ استعمال کرنےکا بارہاکہا ہے لیکن اس کے باوجود دہشت گرد افغان سرزمین سے پاکستان میں دہشت گرد کارروائیاں کر رہے ہیں ۔
بجائے دہشت گرد کو کنٹرول کرنے اور ان دہشت گرد عناصر کی سرکوبی کرنے کے، افغان طالبان ان دہشت گردوں کی مسلسل معاونت کر رہے ہیں ،دہشت گرد افغانستان میں پوری آزادی کے ساتھ موجود ہیں اور پاکستان مخالف دہشت گردانہ سرگرمیوں کے لئے افغان سر زمین کا بے دریغ استعمال کر رہے ہیں ۔
پاکستان سکیورٹی فورسز کسی بھی طرح کی جارحیت کا منہ توڑ جواب دینے کی بھرپور صلاحیت رکھتی ہے ۔
