ضلع بنوں میں ٹارگٹ کلنگ کے دو الگ الگ واقعات میں دو پولیس اہلکار شہید ہوگئے۔ پولیس کے مطابق نامعلوم شدت پسندوں نے مختلف مقامات پر فائرنگ کرکے دونوں اہلکاروں کو نشانہ بنایا۔
پہلا واقعہ سیدگی بکاخیل کے علاقے میں پیش آیا جہاں رات کے وقت نامعلوم شدت پسند نے فائرنگ کرکے پولیس اہلکار محمد روشان کو شہید کردیا۔ پولیس کا کہنا ہے کہ حملہ آور واردات کے بعد فرار ہونے میں کامیاب ہوگیا۔ ذرائع کے مطابق محمد روشان کو ان کے گھر کے سامنے نشانہ بنایا گیا۔
دوسرا واقعہ آزاد منڈی کے قریب پیش آیا جہاں شدت پسندوں کی فائرنگ سے پولیس اہلکار مشکواۃ اللہ شہید ہوگئے۔ بتایا جاتا ہے کہ مشکواۃ اللہ امیر بکاخیل تبلیغی مرکز میں شبِ جمعہ کی سرگرمیوں میں شرکت کے بعد واپس آرہے تھے کہ راستے میں نامعلوم حملہ آوروں نے انہیں نشانہ بنایا۔
پولیس نے دونوں واقعات کے بعد علاقے کو گھیرے میں لے کر شواہد اکٹھے کرنا شروع کردیئے ہیں جبکہ حملوں میں ملوث ملزمان کی تلاش کے لیے سرچ آپریشن بھی جاری ہے۔ پولیس حکام کا کہنا ہے کہ ملزمان کو جلد قانون کے کٹہرے میں لایا جائے گا۔
