اسلام آباد ہائی کورٹ نے توشہ خانہ ٹو کیس میں بانی پی ٹی آئی عمران خان اور بشریٰ بی بی کی سزا کے خلاف دائر اپیلوں پر عائد اعتراضات دور کرتے ہوئے اپیلوں کو باقاعدہ سماعت کیلئے مقرر کرنے کی ہدایت جاری کر دی۔
سماعت جسٹس خادم حسین سومرو نے کی۔ دورانِ سماعت بانی پی ٹی آئی کے وکلاء سلمان صفدر اور سلمان اکرم راجہ عدالت میں پیش ہوئے جبکہ عمران خان کی تینوں بہنیں بھی کمرۂ عدالت میں موجود تھیں۔
عدالت نے حکم دیا کہ دونوں اپیلوں کو نمبر لگا کر باقاعدہ سماعت کیلئے مقرر کیا جائے۔ اس کے علاوہ بانی پی ٹی آئی اور بشریٰ بی بی کی جانب سے دائر دو متفرق درخواستیں بھی منظور کر لی گئیں۔
اسلام آباد ہائی کورٹ نے مرکزی اپیلوں پر اعتراضات دور کرنے سے متعلق متفرق درخواست کو بھی منظور کیا اور اعتراضات دور کرنے کیلئے دی گئی مہلت میں توسیع کی درخواست قبول کر لی۔
عدالت کے اس فیصلے کے بعد توشہ خانہ ٹو کیس میں اپیلوں کی باقاعدہ سماعت کی راہ ہموار ہو گئی ہے۔
