گورنمنٹ پوسٹ گریجویٹ کالج نمبر 1 ایبٹ آباد کے تین سینئر اور قابلِ احترام اساتذہ ایک ہی دن انتقال کر گئے، جس سے کالج کے علمی حلقوں میں گہرے دکھ اور افسوس کی لہر دوڑ گئی ۔
ایبٹ آباد: کالج انتظامیہ کے مطابق انتقال کرنے والے اساتذہ میں شعبہ پاکستان اسٹڈیز کے پروفیسر نوید خان، شعبہ اکنامکس کے پروفیسر ماجد خان اور شعبہ اسلامیات کے چیئرمین پروفیسر فضل الرحمان شامل ہیں ۔
تینوں اساتذہ اپنی علمی خدمات، تدریسی مہارت اور اعلیٰ اخلاق کے باعث اساتذہ اور طلبہ میں یکساں طور پر قدر و احترام کی نگاہ سے دیکھے جاتے تھے ۔
پروفیسر نوید خان اور پروفیسر فضل الرحمان دل کے عارضے کے باعث انتقال کر گئے، جبکہ پروفیسر ماجد خان طویل عرصے سے کینسر کے مرض میں مبتلا تھے اور زیر علاج تھے، ان کی وفات سے نہ صرف کالج بلکہ پورے تعلیمی حلقے میں ایک ناقابلِ تلافی خلا پیدا ہو گیا ہے ۔
کالج کے اساتذہ، طلبہ اور انتظامیہ نے مرحومین کی وفات پر گہرے رنج و غم کا اظہار کرتے ہوئے کہا ہے کہ تینوں اساتذہ نے اپنی زندگیاں علم کی ترویج اور طلبہ کی فکری و اخلاقی تربیت کے لیے وقف کر رکھی تھیں، ان کی خدمات کو ہمیشہ قدر اور احترام سے یاد رکھا جائے گا ۔
