وزیرِ اطلاعات عطا تارڑ نے اعلان کیا ہے کہ عیدالفطر کے مقدس موقع پر آپریشن “غضب للحق” کو عارضی طور پر روک دیا گیا ہے۔ اپنے بیان میں انہوں نے کہا کہ یہ فیصلہ عیدالفطر کے احترام اور برادر اسلامی ممالک کی درخواست پر کیا گیا ہے۔
وزیر اطلاعات کے مطابق سعودی عرب، ترکیہ اور قطر نے اس جنگ بندی کے لیے اہم کردار ادا کیا۔ انہوں نے مزید کہا کہ یہ عارضی جنگ بندی آج رات سے شروع ہو کر 23 اور 24 مارچ کی درمیانی رات تک جاری رہے گی۔
عطا تارڑ نے واضح کیا کہ اس دوران اگر سرحد پار سے کوئی حملہ، دہشتگردی یا ڈرون کارروائی کی گئی تو آپریشن دوبارہ پوری شدت کے ساتھ شروع کیا جائے گا۔
دوسری جانب سعودی وزارتِ خارجہ نے اپنے بیان میں اس اقدام کو امن کی جانب ایک اہم پیش رفت قرار دیا ہے اور کہا ہے کہ یہ جنگ بندی خطے میں استحکام کے لیے مثبت قدم ہے۔ سعودی عرب کا کہنا ہے کہ مذاکرات ہی تنازعات کے حل کا واحد مؤثر ذریعہ ہیں۔
اسی طرح قطر نے بھی اس عارضی جنگ بندی کا خیرمقدم کرتے ہوئے کہا کہ اس سے دونوں ممالک کے درمیان ماحول بہتر ہوگا اور مستقبل میں ایک جامع جنگ بندی معاہدے کی راہ ہموار ہوگی۔
