اسلام آباد: سپیکر قومی اسمبلی سردار ایاز صادق نے شکردرہ روڈ، کوہاٹ پر پولیس موبائل پر فتنہ الخوارج کے دہشتگردوں کے حملے کی شدید مذمت کی ہے۔ انہوں نے حملے کے نتیجے میں ڈی ایس پی اسد محمود خان سمیت سات افراد کے جانی نقصان پر گہرے دکھ اور افسوس کا اظہار کیا ہے۔
سپیکر قومی اسمبلی نے شہید ڈی ایس پی اسد محمود خان، سب انسپکٹر انار گل، ہیڈ کانسٹیبل وہاب علی، کانسٹیبل مدثر اور کانسٹیبل سید عامر عباس کو خراجِ عقیدت پیش کرتے ہوئے شہداء کے لواحقین سے دلی ہمدردی اور تعزیت کا اظہار کیا۔ انہوں نے کہا کہ پوری قوم شہداء کے اہلخانہ کے غم اور دکھ میں برابر کی شریک ہے۔
سردار ایاز صادق نے کہا کہ دہشتگردوں کا مقابلہ کرتے ہوئے جانوں کا نذرانہ پیش کرنے والے شہداء ہمارے ماتھے کا جھومر ہیں۔ پولیس موبائل کو نشانہ بنانا کھلی دہشتگردی اور بزدلانہ کارروائی ہے۔ دہشتگرد عناصر کا اسلام، پاکستان اور انسانیت سے کوئی تعلق نہیں اور ہمارا مذہب کسی بے گناہ کے قتل کی اجازت نہیں دیتا۔
