لوئر چترال کی وادی گرم چشمہ کے دور افتادہ علاقے گبور بخ میں گزشتہ شب برفانی چیتے نے مقامی آبادی پر دھاوا بول دیا، جس کے نتیجے میں ایک ہی خاندان کے درجنوں مویشی مارے گئے۔
اطلاعات کے مطابق گزشتہ رات برفانی چیتا مقامی باشندے عبدالمجید کے مویشی خانے میں گھس گیا۔ چیتے نے بے رحمی سے مویشیوں کے گلے کاٹ کر ان کا خون چوسا، جس کے باعث تقریباً 35 بکریاں اور بھیڑیں ہلاک ہو گئیں۔
صبح جب مالک مویشی خانے پہنچا تو وہاں خون میں لت پت لاشیں دیکھ کر علاقہ مکین دنگ رہ گئے۔
مالی نقصان پر متاثرہ شخص عبدالمجید اور اہل علاقہ نے شدید غم و غصے کا اظہار کیا ہے۔ ان کا کہنا ہے کہ آئے روز جنگلی جانوروں کے حملوں سے ان کا قیمتی اثاثہ ضائع ہو رہا ہے، جس سے مقامی معیشت کو شدید دھچکا لگ رہا ہے۔
متاثرہ خاندان کا کہنا ہے کہ ان کا گزر بسر انہی مویشیوں پر تھا، اب وہ شدید مالی بحران کا شکار ہو گئے ہیں۔ انہوں نے حکومتِ خیبر پختونخوا اور متعلقہ اداروں سے فوری مالی امداد کی اپیل کی ہے.
