اسلام آباد :وفاقی وزیر برائے انفارمیشن ٹیکنالوجی شزہ فاطمہ نے کہا ہے کہ زندگی کے ہر شعبے میں ٹیکنالوجی کا کردار تیزی سے بڑھ رہا ہے اور اب یہ سلامتی سمیت اہم شعبوں میں بھی کلیدی حیثیت اختیار کرچکی ہے۔
اسلام آباد میں تقریب سے خطاب کرتے ہوئے انہوں نے زور دیا کہ مقامی زبانوں میں ڈیجٹائزیشن ناگزیر ہے تاکہ زیادہ سے زیادہ لوگ جدید سہولیات سے فائدہ اٹھا سکیں۔
ان کا کہنا تھا کہ مقامی زبانوں میں مشین لرننگ کو فروغ دینا وقت کی اہم ضرورت ہے۔
شزہ فاطمہ نے کہا کہ حکومت ٹیکنالوجی کے میدان میں ہر قسم کے ماہرین کی حوصلہ افزائی کر رہی ہے، خصوصاً مشین لرننگ اور ڈیٹا سائنس میں مقامی ٹیلنٹ کو فروغ دیا جا رہا ہے۔
وفاقی وزیر نے کہا کہ حکومت وزیراعظم کے ڈیجیٹل پاکستان وژن پر عمل پیرا ہے اور اس مقصد کے حصول کے لیے عالمی شراکت داروں کے ساتھ مل کر کام کیا جا رہا ہے۔
انہوں نے مزید کہا کہ جدید ٹیکنالوجی کے استعمال سے حکومتی امور میں شفافیت آئے گی اور عوام کو بہتر خدمات کی فراہمی ممکن ہو گی۔
