خیبر پختونخوا کے قبائلی ضلع شمالی وزیرستان میں سیکیورٹی فورسز نے دو مختلف کارروائیاں کی ہیں، جس میں بھارتی حمایت یافتہ 7 مزید دہشتگردوں کو اپنے انجام تک پہنچا دیا گیا، میرعلی میں 6 جبکہ علاقہ سپین وام میں ایک دہشتگرد کو ہلاک کیا گیا ۔
پاک فوج کے شعبہ تعلقات عامہ کی جانب سے جاری بیان کے مطابق سیکیورٹی فورسز نے یکم دسمبر کو خیبرپختونخوا کے قبائلی ضلع شمالی وزیرستان میں دو الگ الگ انٹیلی جنس بنیادوں پر آپریشنز کیے ۔
آئی ایس پی آر کے بیان میں کہا گیا ہے آپریشن کے دوران بھارتی حمایت یافتہ 7 دہشت گردوں کو ان کے انجام تک پہنچا دیا گیا ۔
آئی ایس پی آر کے مطابق علاقہ میر علی میں دہشتگردوں کی موجودگی کی اطلاع پر سیکیورٹی فورسز نے آپریشن کیا، آپریشن کے دوران فورسز اور دہشت گردوں کے درمیان شدید فائرنگ کا تبادلہ ہوا، فائرنگ کے نتیجے میں 6 دہشتگرد ہلاک کئے گئے ۔
بیان میں کہا گیا ہے کہ سپن وام میں بھی ایک اور انٹیلی جنس بیسڈ آپریشن کیا گیا جہاں فائرنگ کے تبادلے میں ایک مزید دہشتگرد کو ہلاک کر دیا گیا ۔
آئی ایس پی آر کا مزید کہنا ہے کہ ہلاک دہشتگردوں سے اسلحہ اور گولہ بارود بھی برآمد کیا گیا، ہلاک دہشت گرد سیکیورٹی فورسز، قانون نافذ کرنے والے اداروں اور معصوم شہریوں کی ٹارگٹ کلنگ سمیت متعدد دہشتگرد سرگرمیوں میں ملوث تھے ۔
آئی ایس پی آر کے مطابق علاقے میں بھارتی سپانسرڈ دہشتگردوں کی موجودگی کے خاتمے کے لیے کلیئرنس اور سینیٹائزیشن آپریشنز جاری ہیں ۔
آئی ایس پی آر کا یہ بھی کہنا تھا کہ وفاقی ایپکس کمیٹی برائے نیشنل ایکشن پلان کی منظوری کے بعد شروع کی گئی وژن "عزمِ استحکام” کے تحت ملک سے غیر ملکی پشت پناہی یافتہ دہشت گردی کے مکمل خاتمے تک کاؤنٹر ٹیررازم آپریشنز پوری قوت سے جاری رہیں گے ۔
