سیکیورٹی فورسز نے خیبرپختونخوا اور بلوچستان میں تین مختلف انٹیلی جنس بیسڈ آپریشنز کے دوران مجموعی طور پر 11 دہشتگردوں کو ہلاک کردیا ۔
سیکیورٹی ذرائع کا کہنا ہے کہ بنوں میں کارروائی کے دوران 2 دہشتگرد ہلاک ہوئے ، جبکہ آپریشن کے دوران اسلحہ اور گولہ بارود بھی برآمد کیا گیا ۔
جنوبی وزیرستان کے علاقے لدھا میں سیکیورٹی فورسز نے انٹیلی جنس کی بنیاد پر کارروائی کی، جہاں دہشتگردوں کو گھیرے میں لے کر مؤثر کارروائی کی گئی۔ ذرائع کے مطابق آپریشن میں 5 خوارج ہلاک ہوئے ۔
دوسری جانب بلوچستان کے ضلع خضدار کے علاقے ساسول میں بھی سیکیورٹی فورسز نے کارروائی کی ، جس کے دوران فتنہ الہندوستان سے وابستہ 4 دہشتگرد ہلاک ہوگئے۔ سیکیورٹی ذرائع کے مطابق دہشتگردوں کو کوارڈ کاپٹر کی مدد سے نشانہ بنایا گیا ۔
سیکیورٹی ذرائع کے مطابق تمام کارروائیوں کے دوران عوام کے جان و مال کے تحفظ کو یقینی بنایا گیا ۔
