خیبرپختونخوا کے قبائلی علاقوں میں دہشتگردوں کے خلاف کارروائیاں کامیابی سے جاری ہیں،شمالی وزیرستان میں کامیاب آپریشن کے دوران 22 دہشتگرد ہلاک کردئے گئے،آئی ایس پی آر کے مطابق ہلاک دہشتگردوں کے قبضے سے اسلحہ اور گولہ بارود بھی برآمد ہوا ۔
پاک فوج کے شعبہ تعلقات عامہ کی جانب سے جاری بیان کے مطابق 17 مئی سے شمالی وزیرستان کے علاقے شیوہ میں کلیئرنس و سینیٹائزیشن آپریشن جاری ہے، آپریشن کے دوران سکیورٹی فورسز نے خوارج کے ٹھکانوں کو مؤثر انداز میں نشانہ بنایا گیا ۔
آئی ایس پی آر نے بتایا کہ گزشتہ 24 گھنٹوں میں فتنہ الخوارج سے تعلق رکھنے والے 22 دہشتگردوں کو اپنے انجام تک گیا، ہلاک دہشتگردوں سے اسلحہ اور گولہ بارود بھی برآمد کیا گیا،ہلاک دہشتگرد علاقے میں متعدد دہشتگرد کارروائیوں میں ملوث تھے ۔
ترجمان پاک فوج نے بتایا کہ شواہد سے یہ بھی ثابت ہوا کہ خوارج نے مقامی آبادی کو دھمکیوں اور جبر کے ذریعے اپنے زیراثر رکھا، خوارج نے محفوظ نقل وحرکت کیلئے مقامی آبادی کو انسانی ڈھال کے طورپراستعمال کیا، معصوم شہریوں کی جانوں کو خطرے میں ڈالنے کی ہرگز اجازت نہیں دی جاسکتی ۔
آئی ایس پی آر کی جانب سے مزید بتایا گیا کہ علاقے میں کلیئرنس آپریشن جاری ہے، سکیورٹی فورسز نے علاقے کا مؤثر محاصرہ کررکھا ہے ۔
