سیکیورٹی فورسز کی خیبر پختونخوا میں کاامیاب کارروائیاں جاری ہیں، ضلع بنوں میں خفیہ اطلاع پر ایک اور کامیاب کارروائی کے دوران بھارتی حمایت یافتہ مزید 22 دہشت گرد ہلاک کردیئے گئے ۔
پاک فوج کے شعبہ تعلقات عامہ کی جانب سے جاری بیان میں کہا گیا ہے کہ سیکیورٹی فورسز نے بعلاقے میں بھارتی حمایت یافتہ دہشتگردوں کی موجودگی کی اطلاع پر کامیاب آپریشن کیا ۔
آئی ایس پی آر کے مطابق آپریشن کے دوران فورسز نے دہشتگردوں کے ٹھکانے کو کامیابی سے نشانہ بنایا اور شدید فائرنگ کے تبادلے کے بعد 22 دہشتگردوں کو اپنے انجام تک پہنچادیا گیا ۔
آئی ایس پی آر کے بیان میں مزید کہا گیا کہ علاقے میں موجود کسی بھی دیگر دہشت گرد کو ختم کرنے کے لیے کلیئرنس آپریشن جاری ہے ۔
بیان میں یہ بھی کہا گیا ہے کہ سیکیورٹی فورسز اور قانون نافذ کرنے والے اداروں کی جانب سے دہشت گردی کے خلاف مہم پوری شدت کے ساتھ جاری رہے گی، تاکہ ملک سے غیر ملکی سرپرستی اور حمایت یافتہ دہشت گردی کا خاتمہ کیا جا سکے ۔
دوسری جانب وزیر اعظم محمد شہباز شریف نے سیکیورٹی فورسز کی کامیاب کارروائی پر خراج تحسین پیش کرتے ہوئے کہا کہ وہ عزمِ استحکام کے وژن کے تحت دہشت گردی کے خلاف ’اہم کامیابیاں‘ حاصل کر رہے ہیں ۔
وزیر اعظم نے کہا کہ پوری قوم دہشت گردی کے خلاف پاکستان کی مسلح افواج کے ساتھ کھڑی ہے، ہم ملک سے ہر قسم کی دہشت گردی کو مکمل طور پر ختم کرنے کے لیے پرعزم ہیں ۔
