لاہور: وزیر اعلیٰ پنجاب مریم نواز شریف کی ہدایات پر لاہور سمیت پنجاب بھر میں انسدادِ سموگ گرینڈ آپریشن جاری ہے.
آپریشن کے تحت گزشتہ 20 روز کے دوران 100 سے زائد غیر قانونی اور فضائی آلودگی کا باعث بننے والے یونٹس مسمار کر دیے گئے ہیں۔
سینئر صوبائی وزیر مریم اورنگزیب نے کہا ہے کہ فضائی آلودگی پھیلانے والے یونٹس کو صرف بند نہیں بلکہ مکمل طور پر مسمار کیا جا رہا ہے۔
انہوں نے بتایا کہ صوبے بھر میں ضلع، تحصیل اور یونین کونسل کی سطح پر کریک ڈاؤن جاری ہے اور متعلقہ افسران کو بلاامتیاز کارروائیوں کے واضح احکامات دیے گئے ہیں۔
انہوں نے کہا کہ لاہور شہر میں یونین کونسل کی سطح پر سروے، مانیٹرنگ اور کریک ڈاؤن کا عمل جاری ہے جبکہ شہر کی 200 سے زائد یونین کونسلز اور ہاؤسنگ سوسائٹیز کا سروے مکمل کر لیا گیا ہے۔
مریم اورنگزیب کے مطابق محکمہ ماحولیات، یو سی سیکریٹریز اور ہاؤسنگ سوسائٹیز کے منیجرز پر مشتمل مشترکہ ٹیمیں یونین کونسلز اور ہاؤسنگ سوسائٹیز کا سروے کر رہی ہیں۔
سروے رپورٹ کے مطابق اب تک ان علاقوں میں غیر قانونی فیٹ میلٹنگ یونٹس کی موجودگی کی تصدیق نہیں ہوئی۔
انہوں نے بتایا کہ ڈرون ٹیموں کے ذریعے گراؤنڈ ٹیموں کے نتائج کی تصدیق بھی کی جا رہی ہے تاکہ کارروائیوں میں شفافیت اور مؤثریت کو یقینی بنایا جا سکے۔
سینئر صوبائی وزیر نے شہریوں سے اپیل کی کہ وہ انسدادِ سموگ آپریشن میں حکومت کا ساتھ دیں اور سموگ کا باعث بننے والی سرگرمیوں کی اطلاع 1373 ہیلپ لائن پر دیں۔
انہوں نے کہا کہ سموگ کے خاتمے کے لیے عوام وزیر اعلیٰ مریم نواز شریف کے اقدامات میں بھرپور تعاون کریں۔
