پاکستان تحریک انصاف کے بانی سربراہ کی شفا ہسپتال کے بجائے پمز ہسپتال منتقلی کے معاملے پر پی ٹی آئی نے وفاقی حکومت کے خلاف سپریم کورٹ میں توہین عدالت کی درخواست دائر کردی ۔
اسلام آباد: پی ٹی آئی کی جانب سے پارٹی کے سیکریٹری جنرل سلمان اکرم راجہ اور عزیر بھنڈاری کی دائر کردہ درخواست میں سپریم کورٹ کے 18 اگست 2026 کے حکمنامے کی مبینہ خلاف ورزی پر توہین عدالت کی کارروائی شروع کرنے کی استدعا کی گئی ہے ۔
درخواست میں توہین عدالت کے مرتکب افراد کو شوکاز نوٹس جاری کرنے اور ذاتی حاضری کا حکم دینے کی استدعا بھی کی گئی ہے۔ عدالت سے جواب دہندگان کو توہینِ عدالت کا مرتکب قرار دے کر قانون کے مطابق سزا دینے کی استدعا بھی کی گئی ہے ۔
درخواست میں بانی پی ٹی آئی عمران خان کو فوری طور پر شفا انٹرنیشنل ہسپتال اسلام آباد منتقل کرنے اور ان کا طبی معائنہ کرانے کی استدعا بھی کی گئی ہے ۔
عدالت سے یہ استدعا بھی کی گئی ہے کہ حکم پر عملدرآمد یقینی بنانے کے لیے عدالتی افسر کی تعیناتی یا لوکل کمیشن مقرر کیا جائے ۔
واضح رہے کہ سپریم کورٹ نے عمران خان کو طبی معائنے کے لیے شفا انٹرنیشنل ہسپتال منتقل کرنے کے احکامات جاری کیے تھے تاہم حکومت کی جانب سے ان کو پمز ہسپتال منتقل کیا گیا اور ان کا مکمل طبی معائنہ کرایا گیا جس کے بعد انہیں دوبارہ اڈیالہ جیل منتقل کر دیا گیا ۔
