وفاقی وزیر شزا فاطمہ نے وزیراعظم فیول ریلیف اسکیم پر عملدرآمد کا جائزہ لینے کے لیے رات گئے وفاقی دارالحکومت اسلام آباد کے مختلف پیٹرول پمپس کا اچانک دورہ کیا۔
اس موقع پر وفاقی وزیر نے شہریوں سے فیول ریلیف اسکیم کے لیے رجسٹریشن اور رعایت کے حصول میں پیش آنے والی مشکلات کے بارے میں دریافت کیا۔ انہوں نے شہریوں کو درست رجسٹریشن کے طریقہ کار سے متعلق آگاہی بھی فراہم کی۔
شزا فاطمہ نے واضح کیا کہ فیول ریلیف اسکیم کے لیے رجسٹریشن صرف ایک مرتبہ کرنا ہوگی، اسے بار بار دہرانے کی ضرورت نہیں۔
وفاقی وزیر نے متعلقہ انتظامیہ کو ہدایت کی کہ اسکیم کے تحت اہلیت رکھنے والے تمام رجسٹرڈ شہریوں کو رعایت کی بلا تعطل فراہمی یقینی بنائی جائے۔
انہوں نے پیٹرول پمپس پر فیول ریلیف فراہم کرنے میں ٹال مٹول یا انکار کی شکایات کا بھی سختی سے نوٹس لینے کی ہدایت کی اور ایسے عناصر کے خلاف مؤثر مانیٹرنگ یقینی بنانے کا حکم دیا۔
شزا فاطمہ کے مطابق حکومت کا مقصد اہل شہریوں تک وزیراعظم فیول ریلیف اسکیم کا فائدہ شفاف اور مؤثر انداز میں پہنچانا ہے۔
