صدرِ مملکت آصف علی زرداری نے عالمی یومِ اسکاؤٹس کے موقع پر پانچ لاکھ سے زائد اسکاؤٹس کو مبارکباد دیتے ہوئے کہا ہے کہ اسکاؤٹنگ نوجوانوں کی جسمانی، ذہنی اور روحانی نشوونما میں کلیدی کردار ادا کرتی ہے۔
صدرِ مملکت نے اپنے پیغام میں نوجوانوں پر زور دیا کہ وہ کردار سازی پر خصوصی توجہ دیں اور مثبت سماجی اقدار کو فروغ دیں۔ اُن کا کہنا تھا کہ اسکاؤٹس کو گرین اور موسمیاتی لحاظ سے محفوظ پاکستان کی تشکیل کے لیے متحرک ہونا چاہیے اور ماحولیاتی تحفظ کو اپنی ترجیحات میں شامل کرنا چاہیے۔
صدر زرداری نے کہا کہ منشیات سے پاک اور ڈیجیٹل طور پر بااختیار قوم کی تشکیل وقت کی اہم ضرورت ہے، جس میں نوجوانوں کا کردار فیصلہ کن ثابت ہو سکتا ہے۔ انہوں نے اس بات پر بھی زور دیا کہ ہنگامی حالات اور ڈیزاسٹر مینجمنٹ میں اسکاؤٹس کی خدمات ناگزیر ہیں اور قدرتی آفات کے دوران اُن کی تربیت اور رضاکارانہ خدمات قابلِ تحسین ہیں۔
صدرِ مملکت نے پاکستان سے پولیو کے مکمل خاتمے کے لیے اسکاؤٹس کی فعال شمولیت کو ضروری قرار دیتے ہوئے کہا کہ صحتِ عامہ کے قومی اہداف کے حصول میں نوجوانوں کی شرکت کلیدی اہمیت رکھتی ہے۔ انہوں نے یاد دلایا کہ بانیٔ پاکستان محمد علی جناح نے بھی اسکاؤٹنگ کو نوجوانوں کی کردار سازی کے لیے اہم قرار دیا تھا۔
آخر میں صدر آصف علی زرداری نے امید ظاہر کی کہ پاکستان بوائے اسکاؤٹس ایسوسی ایشن عالمی سطح پر مزید مؤثر کردار ادا کرے گی اور اسکاؤٹس قوم کی تعمیر و ترقی میں ایک مضبوط محرک ثابت ہوں گے۔
