اسلام آباد: حکومت نے پیڑول کی فی لیٹر قیمت میں کمی کا اعلان کردیا اور فنانس ڈویژن نے اس حوالے نوٹیفکیشن بھی جاری کردیا ۔
نوٹیفکیشن کے مطابق آئل اینڈ گیس ریگولیٹری اتھارٹی نے عالمی مارکیٹ میں قیمتوں کے ردوبدل کی بنیاد پر صارفین کے لیے پیٹرولیم مصنوعات کی قیمت کے حوالے سے کام کیا ۔
حکومت نے پیڑول کی فی لیٹر قیمت میں ایک روپے کی کمی کردی ہے، جس کے بعد فی لیٹر پیٹرول کی نئی قیمت 254 روپے 63 پیسے مقرر کی گئی ہے جبکہ اس سے قبل فی لیٹر قیمت 255 روپے 63 پیسے تھی ۔
اسی طرح ہائی سپیڈ ڈیزل کی قیمت میں کوئی ردو بدل نہیں کیا گیا ہے اور فی لیٹر قیمت بدستور 258 روپے 64 پیسے برقرار رہے گی ۔
فنانس ڈویژن کی جانب سے جاری نوٹیفکیشن کے مطابق پیٹرول کی قیمت میں کمی کا اطلاق رات 12 بجے سے ہو چکا ہے ۔
