پاکستان کرکٹ بورڈ (پی سی بی) نے پیر کو لاہور میں منعقدہ ایک تقریب میں آئندہ ٹی ٹوئنٹی ورلڈ کپ 2024 کے لیے قومی اسکواڈ کی آفیشل کٹ کا انکشاف کیا۔
پاکستان کے وائٹ بال کے کپتان بابر اعظم نے سینئر کھلاڑیوں جیسے شاہین شاہ آفریدی، محمد رضوان اور دیگر کے ساتھ ایکس پر کرکٹ بورڈ کی جانب سے شیئر کی گئی ویڈیو میں "میٹرکس جرسی” کے نام سے نئی جرسی کے ساتھ پوز دیا۔ لاہور میں ہونے والی تقریب میں پاکستان کرکٹ بورڈ کے چیئرمین محسن نقوی اور دیگر شریک ہوئے جبکہ کٹ کا نام ’میٹرکس‘ رکھا گیا ہے۔
تقریب سے خطاب کرتے ہوئے محسن نقوی نے کہا ہے کہ 2009 کی طرح قومی کرکٹ ٹیم ٹی ٹوئنٹی ورلڈ کپ کی ٹرافی لے کر آئے گی۔ میرے بس میں ہوتا تو ٹیم کے لیے ایک لاکھ ڈالر سے بھی زیادہ کا اعلان کرتا۔انہوں نے کہاکہ قومی کرکٹ ٹیم میں بھرپور صلاحیت موجود ہے، جیت پر ٹیم کو مزید انعامات بھی دیے جائیں گے، پاک بھارت میچ دیکھنے کے لیے امریکا جاؤں گا۔قذافی اسٹیڈیم لاہور میں ہونے والی کٹ کی رونمائی تقریب میں کپتان بابر اعظم، محمد رضوان، نسیم شاہ، شاہین شاہین آفریدی کے علاوہ پاکستان کرکٹ بورڈ کے عہدیدار بھی شریک ہیں۔چیئرمین پاکستان کرکٹ بورڈ محسن نقوی نے کٹ کی رونمائی کے موقع پر کھلاڑیوں کے ساتھ تصاویر بھی بنوائیں۔ واضح رہے کہ ٹی ٹوئنٹی ورلڈ کپ اس سال 2 سے 29 جون تک امریکا اور ویسٹ انڈیز میں منعقد ہوگا۔
