اسلام آباد: صدر آصف علی زرداری نے پاکستان اور سویڈن کے درمیان تجارت، ٹیکنالوجی اور ہنرمندی کے فروغ سمیت مختلف شعبوں میں تعاون مزید بڑھانے پر زور دیا ہے۔
صدر آصف علی زرداری نے ان خیالات کا اظہار سویڈن کے لیے پاکستان کے نامزد سفیر احمد امجد علی سے گفتگو کرتے ہوئے کیا، جنہوں نے ایوانِ صدر میں ان سے ملاقات کی۔
صدر مملکت نے قابلِ تجدید توانائی، پائیدار ٹیکنالوجیز، انفارمیشن ٹیکنالوجی اور زراعت کے شعبوں میں دوطرفہ تعاون وسعت دینے کی ضرورت پر زور دیا۔
صدر مملکت نے کہا کہ پارلیمانی روابط اور قیادت کی سطح پر دورے پاکستان اور سویڈن کے باہمی تعلقات کو مزید مستحکم بنانے میں اہم کردار ادا کرسکتے ہیں۔
صدر مملکت نے نامزد سفیر کو مبارکباد دیتے ہوئے کہا کہ پاکستان اور سویڈن کے درمیان دوستانہ تعلقات قائم ہیں۔
دونوں ممالک کثیرالجہتی نظام، قواعد پر مبنی عالمی نظام، انسانی حقوق اور جمہوریت سمیت متعدد امور پر یکساں مؤقف رکھتے ہیں۔
انہوں نے کہا کہ پاکستان سویڈن کو اہم اقتصادی و تجارتی شراکت دار اور یورپی یونین، اقوام متحدہ سمیت دیگر کثیرالجہتی اداروں کا اہم رکن سمجھتا ہے۔
آصف علی زرداری نے اس اعتماد کا اظہار کیا کہ نامزد سفیر سویڈن میں مقیم ہزاروں پاکستانیوں سے قریبی رابطہ رکھیں گے۔
سویڈن کی ترقی میں ان کے کردار کو اجاگر کریں گے اور پاکستان کے لیے خیرسگالی کے فروغ میں اپنا کردار ادا کریں گے۔
