پاکستان منرلز انویسٹمنٹ فورم 2025 کا انعقاد 8 اور 9 اپریل کو اسلام آباد میں کیا جائے گا جو ملک کے معدنی شعبے کے لیے ایک تاریخی اور انقلابی اقدام ثابت ہوگا۔
اسپیشل انویسٹمنٹ فیسیلیٹیشن کونسل (ایس آئی ایف سی) کی معاونت سے حکومت کی موثر حکمت عملی کے تحت یہ فورم پاکستان کے وسیع معدنی وسائل سے معاشی استحکام حاصل کرنے کی راہیں ہموار کرے گا۔
پاکستان سونے اور تانبے کے وسیع ذخائر سمیت متعدد قیمتی معدنیات کا حامل ہے جو عالمی سرمایہ کاروں کے لیے ایک سنہری موقع فراہم کرتا ہے۔ یہ فورم عالمی سرمایہ کاروں، پالیسی سازوں، اور صنعت کے ماہرین کو پاکستان کے کان کنی کے شعبے میں سرمایہ کاری کے مواقع سے روشناس کرائے گا۔
حکام کے مطابق، معدنی وسائل میں سرمایہ کاری نہ صرف پاکستان کی برآمدات میں اضافہ کرے گی بلکہ ملکی معیشت کو مستحکم بنانے میں بھی کلیدی کردار ادا کرے گی۔
فورم کے دوران کان کنی کے شعبے میں ترقی پر مباحثوں کے ساتھ ساتھ جدید ٹیکنالوجیز اور وسائل کی نمائش بھی کی جائے گی۔
حکومت کی جانب سے حال ہی میں متعارف کرائی گئی اصلاحات جیسے کہ نیشنل منرل ہارمونائزیشن فریم ورک، سرمایہ کاروں کے لیے سازگار ماحول پیدا کرنے اور کان کنی کے شعبے کو عالمی معیار کے مطابق ڈھالنے کی جانب اہم قدم ہیں۔
