اسلام آباد: سکیورٹی فورسز کی پاکستان-افغانستان سرحدی علاقے میں کامیاب انٹیلی جنس بیسڈ کارروائیوں کے نتیجے میں 29 دہشت گرد ہلاک ہو گئے۔
وفاقی وزیر اطلاعات عطا اللہ تارڑ نے سوشل میڈیا ایکس پر جاری اپنے پیغام میں کہا کہ آپریشن "غضبُ لِلحق” کے تسلسل میں، مستند انٹیلی جنس اطلاعات کی بنیاد پر 28 اور 29 جون کی درمیانی شب سکیورٹی فورسز نے پاکستان-افغانستان سرحدی علاقے میں جماعت الاحرار اور فتنہ الخوارج کے دہشت گرد کیمپوں اور محفوظ ٹھکانوں کو کامیابی سے نشانہ بنایا۔
پکتیا، پکتیکا اور کنڑ میں واقع تین اہداف کو انتہائی درستگی کے ساتھ تباہ کیا گیا۔ کارروائی میں 25 دہشت گرد ہلاک ہوئے جبکہ بڑی مقدار میں اسلحہ اور گولہ بارود بھی تباہ کر دیا گیا۔
ضلع باجوڑ میں پاکستان-افغانستان سرحد کے قریب دہشت گردوں کے ایک گروہ کے خلاف انٹیلی جنس بیسڈ آپریشن کیا گیا۔
آپریشن میں دہشت گرد کمانڈر خان فروش عرف زابل سمیت بھارتی پراکسی جماعت الاحرار کے مزید تین دہشت گرد ہلاک اور متعدد زخمی ہوئے۔
وزیر اطلاعات نے کہا کہ پاکستان خطے میں امن، استحکام اور ہمسایہ ممالک کے ساتھ مثبت تعلقات کے فروغ کے لیے ہمیشہ کوشاں رہا ہے، تاہم اپنے شہریوں کی جان و مال کا تحفظ اور قومی سلامتی ہر صورت ہماری اولین ترجیح رہے گی، جس پر کسی قسم کا سمجھوتہ نہیں کیا جائے گا۔
