ضلعی انتظامیہ مری کی جانب سے شہر کے مختلف علاقوں میں جدید اور دیدہ زیب چراغاں کیا گیا ہے، جس سے مری رات کے وقت ایک حسین منظر پیش کرنے لگا ہے۔
مال روڈ، کشمیر پوائنٹ، لوئر بازار، اپر بازار اور دیگر اہم مقامات پر لائٹس کی تنصیب سے شہر کی رونق دوبالا ہوگئی ہے۔یہ اقدام وزیراعلیٰ پنجاب مریم نواز کے ویژن کے مطابق کیا گیا ہے، جس کا مقصد مری کو ایک خوبصورت، محفوظ اور سیاح دوست مقام بنانا ہے۔
چراغاں نہ صرف سیاحوں کی توجہ کا مرکز بن گیا ہے بلکہ مقامی افراد بھی اس خوبصورتی سے محظوظ ہو رہے ہیں۔
ضلعی انتظامیہ کے مطابق شہر کی صفائی، ٹریفک کی بہتری اور دیگر سہولیات پر بھی خصوصی توجہ دی جارہی ہے تاکہ سیاحوں کو خوشگوار ماحول فراہم کیا جا سکے۔
مری کی قدرتی خوبصورتی کو برقرار رکھتے ہوئے جدید سہولیات فراہم کرنا اولین ترجیح ہے۔ سیاحوں نے چراغاں کے انتظامات کو سراہتے ہوئے کہا ہے کہ اس اقدام سے مری کی کشش میں مزید اضافہ ہوا ہے اور رات کے وقت سیر و تفریح کا لطف دوبالا ہوگیا ہے۔
ضلعی انتظامیہ نے یقین دہانی کرائی ہے کہ آئندہ بھی ایسے اقدامات جاری رکھے جائیں گے تاکہ مری کو پاکستان کے بہترین سیاحتی مقامات میں نمایاں مقام دلایا جاسکے۔
