لاہور: وزیراعلیٰ پنجاب مریم نواز شریف نے ستھرا پنجاب کی گاڑیوں کی جانب سے ٹریفک قوانین کی خلاف ورزی پر شدید برہمی کا اظہار کیا ہے۔
انہوں نے ستھرا پنجاب کی ایک گاڑی تلے آ کر کمسن بچی کے جاں بحق ہونے کے واقعے پر بھی گہرے دکھ کا اظہار کیا۔
وزیراعلیٰ نے خصوصی اجلاس کی صدارت کرتے ہوئے ستھرا پنجاب کی تمام گاڑیوں کو ہر صورت ٹریفک قوانین کا پابند بنانے کا حکم دیا۔
انہوں نے کہا کہ لاہور کے داخلی و خارجی راستوں پر ٹریفک کی آمدورفت میں کسی قسم کی رکاوٹ برداشت نہیں کی جائے گی۔
شاہدرہ اور ٹھوکر نیاز بیگ پر ٹریفک جام کے فوری سدباب کے لیے اقدامات کرنے کی بھی ہدایت کی گئی۔
اجلاس میں ٹریفک مینجمنٹ کے حوالے سے کئی اہم فیصلے کیے گئے۔
وزیراعلیٰ نے لاہور کی تمام معروف سڑکوں پر بائیک لینز مقرر کرنے، پیدل افراد کے لیے زیبرا کراسنگ کی پابندی یقینی بنانے اور الرٹ بٹن نصب کرنے کی تجویز کا جائزہ لینے کا حکم دیا۔
زیبرا کراسنگ پر خلاف ورزی روکنے کے لیے کیمروں سے ڈیجیٹل نگرانی پر اتفاق ہوا اور مال روڈ پر پہلا پائلٹ پراجیکٹ شروع کرنے کی ہدایت کی گئی۔
بریفنگ میں بتایا گیا کہ نمبیو گلوبل ٹریفک رینکنگ انڈیکس میں لاہور 149 ویں سے 29 ویں نمبر پر آ چکا ہے۔
جاتی امراء چوک، پائن ایونیو، ڈیفنس موڑ، کریم بلاک، اکبر فلائی اوور اور کاہنہ سمیت مختلف مقامات پر ٹریفک کے رش میں 70 فیصد تک کمی آئی ہے۔
لاہور میں 16 سے 18 سال کے بچوں کے لیے 4096 ٹریفک پرمٹ جاری کیے جا چکے ہیں جب کہ خواتین کے تحفظ کے لیے شہر میں 65 ہزار پنک بٹن نصب کیے گئے ہیں۔
وزیراعلیٰ نے گنے کا سیزن شروع ہونے سے قبل اوور لوڈنگ کے خلاف کارروائی اور مال بردار ٹریکٹر ٹرالیوں کو کور کے بغیر سڑک پر نہ لانے کی پابندی یقینی بنانے کا بھی حکم دیا۔
انہوں نے فیروزپور روڈ کو لاہور کا ماڈل روڈ قرار دینے اور پائن ایونیو و جاتی امراء چوک میں ٹریفک سگنل لگانے کی ہدایت بھی کی۔
