لاہور: عالمی یومِ انسدادِ چائلڈ لیبر کے موقع پر وزیراعلیٰ پنجاب مریم نواز شریف نے اپنے خصوصی پیغام میں بچوں سے مشقت لینے کے رجحان کے خاتمے کے عزم کا اعادہ کرتے ہوئے کہا ہے کہ "نو چائلڈ لیبر پنجاب” حکومت کا واضح اور ناقابلِ تردید عزم ہے۔
وزیراعلیٰ پنجاب نے والدین پر زور دیا کہ وہ اپنے بچوں کو تعلیم، صحت اور کھیل کود جیسی بنیادی سہولیات فراہم کریں اور انہیں مشقت کی بجائے بہتر مستقبل کے مواقع دیں۔
انہوں نے اپیل کی کہ "پھول جیسے بچوں سے پیار کریں، مشقت نہ کرائیں”۔
مریم نواز شریف نے کہا کہ مہذب اور باوقار معاشروں میں بچوں کے حقوق کا احترام یقینی سمجھا جاتا ہے۔
ان کا کہنا تھا کہ پنجاب آج بچوں کے لیے محفوظ ترین صوبہ ہے اور "بچے میری ریڈ لائن ہیں”۔ انہوں نے واضح کیا کہ بچوں پر تشدد یا کسی بھی قسم کی زیادتی قطعی طور پر ناقابلِ برداشت ہے۔
وزیراعلیٰ نے اس عزم کا اظہار کیا کہ اینٹوں کے بھٹوں سمیت کسی بھی مقام پر چائلڈ لیبر کے ارتکاب پر سخت ترین قانونی کارروائی عمل میں لائی جائے گی۔
ان کے مطابق عالمی یومِ انسدادِ چائلڈ لیبر کا پیغام "بچوں کے لیے منصفانہ مواقع، مشقت ناقابلِ قبول اور نوجوانوں کے لیے باعزت روزگار” ہے۔
انہوں نے کہا کہ پنجاب میں چائلڈ پروٹیکشن بیورو اور سماجی بہبود کے دیگر ادارے بچوں کے تحفظ کے لیے متحرک کردار ادا کر رہے ہیں۔
مریم نواز شریف نے کہا کہ ہر بچہ قوم کا مستقبل ہے اور وہ بچوں کے ہاتھوں میں اینٹ، پتھر اور لوہے کے بجائے کتاب اور لیپ ٹاپ دیکھنا چاہتی ہیں۔
